ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ វេជ្ជបណ្ឌិត ហ៊ុយ រ៉េកុល ប្រាប់ព័ត៌មានក្នុងស្រុកថា ក្រសួងសុខាភិបាល បានបញ្ជូនថ្នាំអាប៊ែតចំនួន៣៥០តោន ទៅតាមរាជធានី ខេត្តរួចរាល់អស់ហើយ ដើម្បីត្រៀមចែកចាយដាក់នៅតាមផ្ទះរបស់ប្រជាពលរដ្ឋ និងដើម្បីសម្លាប់ដង្កូវទឹក ដែលជាភ្នាក់ងារចម្លងជំងឺគ្រុនឈាម។
នេះគឺជាផែនការដើម្បីទប់ស្កាត់ជំងឺគ្រុនឈាម ខណៈដែលរដូវវស្សាឈានចូលមកដល់។ តែ សម្រាប់តំបន់មួយចំនួន បានចែកថ្នាំនេះរួចហើយ ដោយសារតែរដូវវស្សាបានចូលមកដល់លឿន។
គួរជ្រាបថា ការដាក់ថ្នាំអាប៊ែតនេះ ក្រសួងធ្វើពីរដងក្នុង១ឆ្នាំ គឺនៅដើមរដូវវស្សាពេល ចាប់ផ្តើមធ្លាក់ភ្លៀង និងលើកទី២នៅចុងរដូវវស្សានៃឆ្នាំនីមួយៗ។ ក្រសួងសុខាភិបាល ក៏បានអំពាវនាវដល់ពលរដ្ឋបើសង្ស័យថាកូនចៅរបស់ខ្លួន មានជំងឺគ្រុន ឈាម ត្រូវបញ្ជូនជាបន្ទាន់ ទៅកាន់មន្ទីរ ពេទ្យ ដ្បិតថា ជំងឺគ្រុនឈាម មិនអាចព្យាបាលនៅតាមផ្ទះបានទេ ត្រូវតែបញ្ជូនទៅមណ្ឌលសុខភាព ឬមន្ទីរពេទ្យ ដែលមានជំនាញត្រឹមត្រូវ។
បើតាមមន្ត្រីជំនាញរបស់ក្រសួងសុខាភិបាល, ស្ថានភាពជំងឺគ្រុនឈាមនៅឆ្នាំនេះ គឺមិនមានអ្វីគួរឱ្យព្រួយបារម្ភនោះទេ ដោយសារតែករណីជំងឺគ្រុនឈាមមានការថយចុះយ៉ាងខ្លាំងនៅដើមឆ្នាំ២០១៧នេះ។ ក្នុងពេលជិត២០សប្តាហ៍ចុងក្រោយនេះ ជំងឺគ្រុនឈាមមានចំនួន៦៤២ករណី តែគ្មានការស្លាប់ទេ! បើធៀបនឹងរយៈពេលដូចគ្នា កាលពីឆ្នាំ២០១៦កន្លងទៅ ដែលមាន ចំនួន១៦១៤ករណី ក្នុងនោះ មានស្លាប់មនុស្ស៣នាក់៕
-ប្រភពពីAKP
ដកស្រង់ពី៖ RFI
No comments:
Post a Comment